23‏/11‏/2007

مكتوب


للقلم رونقه و للحروف بهائها و للمداد رائحة اشتقت اليها و اشتاقت الى
فعذراً ايها الاحبة فقد كنت أحاول إيقاظ قلبى من سباته العميق وإخراجه من غيبوبته التى دخلها من زمن لم أعد أذكره .. فمنه تأتى كلماتى .. وبنبضه تحيا .. وإليه تعود لتختبئ من غدر البشر .. تستكين قليلاً لكنها دائماً ما تعود . فالكلمة طائر عاشق للحرية .. تكره الاقفاص حتى و إن كانت هذه الاقفاص أقفاص القلوب

-------------------------------------

من زمن .. وقبل ما يكون الزمن
فوق صفحة فى كتاب الزمن
إنكتب إنى أكون أنا الغريب
وتكونى ليا أنتِ الوطن
إنكتب إنى أكون أنا الروح الشريدة
وتكونى ليا أنتِ الجسد
إنكتب إنى أكون أرض العطش
حلم الغلابة فى الليل العليل
ضحكة صبية للزمن البخيل
وتكونى ليا أنتِ المطر
أنتِ الطريق
أنتِ االقمر
والغربة ايه من غير وطن
الارض ايه من غير قمر
الحلم ايه من غير طريق
العشق ايه من غير حبيب
وإحنا جميعاً
غربة و وطن
أرض و قمر
حلم و طريق
عشق و حبيب
مكتوب نكون المستحيل
مكتوب نكون
قصيدة بتتولد .. و .. بتتكتب .. و .. تموت
وحكاية يحكيها الولاد .. ساعة عصارى فوق سطح البيوت
غنيوة لسه صغيرة بتنعزف ع الربابة مع المواويل
مكتوب تكونى إنتِ الوطن
وأكون أنا
-
-
المستحيل

هناك 24 تعليقًا:

سهر الليالى يقول...

الله على الكلمات والأحساس أنا بحاول بس ألحق أول كرسى
بس عشان اعلق هاجى تانى لان لازم قراءة مش مرة ولا اتنين
حمد الله على السلامه

سهر الليالى يقول...

صديقى العزيز حازم
صاحب أرق أعتذار
والعازف على الكلمات
حتى ولو كانت بالعامية
(مع انى مش عارفة ايه المشكلة فى العامية)

مكتوب تكونى إنتِ الوطن وأكون أنا
-
-
المستحيل

ليه المستحيل والقلب لاقى القلب اللى يكمله
ليه المستحيل لما يكون

إنكتب إنى أكون أنا الغريب وتكونى ليا أنتِ الوطن
إنكتب إنى أكون أنا الروح الشريدةوتكونى ليا أنتِ الجسد

تحياتى الرقيقة ليك ولما كتبت

اسكندراني اوي يقول...

سمع هووووووووووووووووووووس

حازم بيحب واراهن باكله سمك بوري سنجاري

صح
ههههههههههههههههههههههههههههههه

صديقي العزيييييييز

اكيد للمداد رائحه المسك حين يكتب عن من تحب



حلم الغلابة فى الليل العليل
ضحكة صبية للزمن البخيل
وتكونى ليا أنتِ المطر
أنتِ الطريق
أنتِ االقمر



وهم يا حاااازم
الكلمتين دول جبارين وانا بقراهم وقفت ومش عاوز اكمل

تحياتي....ولك كل الاماني بالسعاده

الحب الجميل يقول...
أزال المؤلف هذا التعليق.
لماضة يقول...

ازيك يا رجل المستحيل
انت عاوز تطمع الناس فيك ولا ايه
بقولك يا استاذى فى شوية اكسير محوشهملك على جنب تعالى عشان تاخدهم هههههه
متخفش انت فى الوينج اليمين لان هو ده اللى فى القائمه اللى تحت الانشاء
يلا مستنيه احلامك الجميله

MKSARAT يقول...

صديقى الجميل حازم

عندما ختمت بتلك الكلمات
مكتوب تكونى إنتِ الوطن
وأكون أناالمستحيل

حقا لا تعليق لن اوفى تلك العبارة حقها وبالتالي حق من كتبها
اشكرك على مشاعرك الصافية
صديقك
سيد سعد

Zain يقول...

الجميل حزوم
وحشتني ياراجل والله.. أتمنى تكون بخير دائما.. دائما وستظل أنت المستحيل..لكن صدقني.. كانت خيالاتنا هي الوطن.. فقد علمني الزمن..
أنه ليس هناك وطن..
ليس هناك وطن..
هناك وطن..
وطن..
!!
مش هاأقولك القصيده حلوة..لأنها فعلا حلوة ومن النوع الذي يترك دفئا في القلب..ليتحول إلى عاصفة جليدية في النهاية.. أريد فقط أن أعرف منك من هو الوطن؟
تحياتي وحبي الدائمين

الكونتيسة الحافية يقول...

أن تكوني أنتي الوطن
وأنا المستحيل..

لا شيء يقولك أفضل

دمت دوما بخير

cinderella يقول...

رااااااااااائع
اكثر من رائع
سلمت الانامل

Salwa يقول...

غنيوة لسه صغيرة بتنعزف ع الربابة مع المواويل
مكتوب تكونى إنتِ الوطن
وأكون أنا
-
-
المستحيل


جميله جدا ... جدا ... جدا

خالص تحيااااااتي

عاليا حليم يقول...

كالعادة طبعا و بدون مجاملة رائعة بس فيها حاجة غريبة شوشرت عليا شوية المتعة ، فى جمل عامية داخلة فى وسط الجمل الى بالفصحى ، مش كده و لا انا الأمر مختلط عليا ؟؟؟؟؟ انا بحسد الى بيكتبلها الكلام ده بصراحة حاسب عليها منى باه :))))))))))))))

نورسين يقول...

أهي المقدرات ... أظنها كذلك!

تمر بنا ايامنا نتلو فيها صفحات كتاب لا نراه ؟؟

كعادتك حازم حالم حقا كما اسميت نفسك ...وكما هي الحقيقة ... ولكن لما تقبل أن تكون انت المستحيل .. ؟
المستحيل امر دائما ما يستفز الخوارق ومكامن الطاقات فلا تقبل باستحالتك على وطنك ..


تحياتي لك دايما حازم
وخالص احترامي لقلمك

shreen يقول...

حازم
لا اعلم لماذا كلما اقرأ شئ خططته انت
اشعر انى انا من كتبه
كلماتك رائعه
معبره
ذات رونق خاص يخترق القلوب مباشره

قد يبدو تعليقلى على هذه الجزئيه بالذات امرا غير مألوفا
الا انها مستنى جدا
وشعرت انى من كتبها

للقلم رونقه و للحروف بهائها و للمداد رائحة اشتقت اليها و اشتاقت الى
فعذراً ايها الاحبة فقد كنت أحاول إيقاظ قلبى من سباته العميق وإخراجه من غيبوبته التى دخلها من زمن لم أعد أذكره .. فمنه تأتى كلماتى .. وبنبضه تحيا .. وإليه تعود لتختبئ من غدر البشر

sad_doraa يقول...

ايه ده جامممممممممدة

الحب الجميل يقول...

الشاعر الجميل حازم
اود الاعتزار لألغائى التعليق وذلك لأحساسى انة لا يليق بعزوبة وجمال وروعة ما قرئتة من كلمات كادت تعبر عن نفسى وعلى علو احساسك وتعبيرك الرائع
ولن احدد جزئية بعينيها بل كل كلمة صنعتها اصابعك مثل قطعة الماس 0لك كل تقديرى واحترامى على ماتقدمة لنا من كلمات واحساس 0
ربنا الموفق00 واشكرك على اتاحة الفرصة لنا على كل كلمة تكتبها ان نقرؤها وتصل الى قلوبنا 0000
تحياتى

عاليا حليم يقول...

صديقى العزيز
محتاجة منك خدمة قصيدة ( لم يكن نغم ) اخر بوست عندى ده يمكن تاخدها مجلة معورفة منى بس اكيد انت خت بالك انى عندى غلطات نحوية فأرجوك قولى ملحوظاتك قبل ما اسلمها و يا ريت لو حتعبك معايا تقولى على طول ده حيفدنى اوى ، أصل مشكلتى انى ما بعرفش اعمل حساب القواعد و انا بكتب الموضوع ده بيقيدنى مش عارفة ليه
مستنية ردك

غير معرف يقول...

حلوة يا حزوم بس انا لى راى ياريت تقرا ماتكتب مرات عديدة(عديدة)قبل النشر حتى تمر على مواقع الضعف فتقويها وتقبل نقدى يا زميلى يا بتاع القهوة المحوجة.....مع خالص الامنيات بالنجاح الدائم

ســـــــمــــكة يقول...

كلمات جميلة اوي.
الشعور بغربة النفس اسوء شعور لكن ساعات بيكون مريح لما يكون الوطن موجود بس بعيد

رائع
تحياتي

mirage يقول...

كلماتك بسيطة وكلها احساس ...
تحياتي

dr.Roufy يقول...

وأكون أنا
-
-
المستحيل

بجد .مش عارفة اقول ايه..ختمة رائعة لكلمات.. فوق الوصف
كل سنة وانت طيب
:)

shreen يقول...

حازم
ايها الرائع
وتصف كتباتى انا انها تقطر حزنا
كتاباتك انت تقطر الما
دموعا
ما بالك صديقى العزيز فاقد الامل؟
لماذا مكتوب ان تكونا مستحيل ؟
تحدى القدر
المستحيل وجد لنقهره
ومن يقهر المستحيل
سوى المعجزه

وما المعجزه الاكبر من الحب

طالما مكتوب ان تكون هى الوطن
لا يوجد من يضل عن وطنه
تحدى المستحيل
اقهره
اهزمه
حتى تنعم بالعيش بوطنك

هالة يقول...

الغربة ايه من غير وطن الارض ايه من غير القمر الحلم ايه من غير العشق الشعر ايه من غير حازم بجد فوق فوق الروعه بحييك يا حازومه احلى ما كتبت تسلم ايدك ويسلم احساسك كلنا بنحبك..........!!!!!!!

غير معرف يقول...

اة الكلام الحلو دة انت كنت مفجاءة لي انا عارفة انك من زمان رومنسي بس مكنتش فاكرة انك جامد كدة ياريت كنت انت 00000 سامحني

m.g يقول...

nice topic & dats my blog i hope you visit us ;)

http://ngomnews.blogspot.com